AZAM SC YAENDELEA NA MAZOEZI MAKALI KAMBINI MISRI

 Kikosi cha Azam SC kinaendelea na programu kali ya mazoezi  kambini mjini El Gouna, Misri.

Azam FC imetimiza siku ya tatu ikiwa huko kambini, ambapo wachezaji wamekuwa wakifanyiswa mazoezi ya nguvu ili kuhakikisha wanakuwa fiti.

 

Benchi la ufundi la Azam FC chini ya Kocha Mkuu, Abdihamid Moallin, limeshamaliza programu saba za mazoezi kwa siku tatu za mwanzo.

 

Siku ya kwanza juzi Jumamosi, wachezaji walifanyishwa mazoezi mara tatu, wakianzia na ile ya uwanjani asubuhi kabla ya mchana kwenda ‘gym’ kuimarisha viungo na usiku wakamalizia uwanjani tena.

 

Aidha siku ya pili jana Jumapili wakaongezewa programu ya mazoezi, wakifanya mara tatu, wakianzia ya uwanjani asubuhi na kumalizia gym mchana, programu ambayo wamerudia tena leo Jumatatu.

 

Programu hizo zimekuwa zikisimamiwa na Kocha wa viungo, Mikel Guillen, ambaye amekuwa makini kuhakikisha wachezaji wanafanya kiustadi mazoezi hayo na amekuwa mkali kwa yule anayeenda kinyume.

 

Kocha wa washambuliaji, Kali Ongala, naye ameanza rasmi kuwanoa washambuliaji katika ufungaji, programu aliyoianza jana Jumapili na kuendelea nayo leo.

Akizungumza na mtandano rasmi wa klabu, www.azamfc.co.tz, Kocha Moallin alisema kuwa wanatarajia kucheza mechi mbili hadi tatu za kirafiki wakati wakiwa kambini Misri.

 

“Ni muda wa kutambulisha mbinu mpya za kiufundi kuna wachezaji wapya wameingia kwenye timu na watacheza mechi chache za kirafiki tayari kwa msimu mpya tutaanza na Wadi Degla ni timu nzuri hapa pia tutacheza na Suez SC,” alisema Moallin.

Alisema kuna uwezekano wakacheza mechi ya tatu ya kirafiki kabla ya kurejea Dar es Salaam Agosti 12.